GísliRafn.com

Nú er óveður hér á Juvaas eins og sjá má á myndinni fyrir neðan. Lyfturnar voru lokaðar í dag þannig að við erum búin að vera að horfa á video og fara á eina þrekæfingu.

Seinasta vika var reyndar mjög góð, fengum 5 frábæra daga og fórum svo heim um helgina til Geilo. Þar gisti ég hjá Fanney systur. Skíðunin hjá mér hefur gengið mjög vel, ég fór hægt af stað enda ekki skíðað í 6 mánuði og hef sem betur fer ekkert fundið til í hnénu. Var meira að segja farin að skíða í svigbraut á föstudaginn. Nú er bara að vona að veðrið hérna batni eitthvað svo maður geti haldið áfram að æfa

Tók þá ákvörðun að fara á skíði í Noregi og taka bílinn okkar gamla (volvo ‘92) með í leiðinni. Fanney systir mun nota hann í Geilo þar sem hún er í skíðamenntaskóla og svo munu mamma, pabbi og Björn Ásgeir bróðir taka hann eftir jól en þá eru að fara að flytja til Noregs í nokkra mánuði.
Það var frekar rólegt í ferjunni, tók þrjá daga samtals að fara til Danmerkur með viðkomu í Færeyjum. Það kom sér vel að ég gat farið á æfingar í ræktinni um borð, annars hefði ég líklega dáið úr leiðindum. Svo þegar ég kom til Danmerkur kl. 9 um morguninn lagði ég strax af stað til Geilo í Noregi og tók sú keyrsla um 13 tíma. Bjóst við að það yrði frekar erfitt þar sem ég er alltaf næstum sofnaður þegar ég þarf að keyra stystu vegalengdir heima á Íslandi en það gerðist ekki í þetta skiptið heldur hafði ég bara nett gaman af þessu.