GísliRafn.com

Heyrðu ég kom heim á sunnudaginn (í dag er laugardagur) en heimferðin gekk vel og ekki verra að hafa svona marga pabba með til að hjálpa sér
Flugið var svolítið lengi að líða, fann mikið til eftir 1,5klst af fluginu en þá fékk ég að færa mig í flugfreyjusætið við útganginn og gat þá rétt úr fætinum sem var betra.
Nú þegar heim var komið fór ég til Örnólfs læknis í Orkuhúsinu og hann leit á hnéð og leist vel á það. Hann tappaði aðeins af hnénu til að minnka bólguna. Svo byrjaði ég í sjúkraþjálfun hjá Róbert á fimmtudaginn og er búinn að hitta hann daglega síðan. Það gengur vel með sjúkraþjálfunina og æfingarnar sem ég er að gera en nú er mikilvægt að ég nái að rétta úr hnénu og fái mátt í lærið og er ég að gera ákveðnar æfingar til þess 5 sinnum á dag.

Já það er komið á hreint og ég er búinn í aðgerðinni. Fór í hana á mánudaginn og læknarnir sögðu að ég hefði hlotið alvarleg meiðsli á hnénu:

Krossbönd rifin

Báðir liðþófar rifnir

Liðböndin tognuðu

Liðfletirnir mörðust og brjóskið rifnaði á liðflötunum.

Í raun voru allir hlutar liðsins laskaðir, en aðgerðin tókst vel og læknarnir stóðu sig vel

Á þriðjudeginum fékk ég mikla verki í hnéð og hita og hnéð hafði bólgnað mikið og því var ég svæfður aftur og tappað af hnénu og það speglað. Kom í ljós að allt var í lagi í hnénu þannig að verkirnir stöfuðu líklega bara af þrýstingi útaf bólgunni í hnénu. Síðustu dagar hafa verið ágætir, ég hef stundum verið með mikla verki en hef þá fengið lyf sem linaði þá.

Einar Þór og Tommi komu til mín á miðvikudaginn en þeir voru á leið á Troppolino barnamótið á Ítalíu með sex krakka en þetta mót er eins konar heimsmeistaramót barna. Hef ekki heyrt frá þeim ennþá en vona að það hafi gengið vel hjá þeim. Troppolino-hópurinn mun svo koma að sækja mig á morgun (laugardag) og þá keyrum við til Frankfurt og fljúgum svo heim á sunnudag.

Eftir það taka við a.m.k. sex vikur í spelku og hækjur en svo mun ég hefja endurhæfingu á fullu og stefna að því að komast á skíði sem fyrst aftur ;) 

Já það á ekki af manni að ganga.
Ég startaði í gær nr. 33 í úrtökumóti fyrir HM í svigi hér í Val d’Isere og skíðaði mjög vel fyrri hluta brautarinnar, var með áttunda besta millitímann og 0,8 sekúndum á eftir fyrsta manni, finnanum Markus Sandell.
Rétt eftir miðja brautina setti ég hnéð inn og festist á kantinum þannig að efri líkaminn fór áfram og hnéð allt of langt inn og ég fann svakalegan sársauka í hægra hnénu og skíðaði bara beint vegna sársaukans og út úr brautinni.

Það var farið með mig niður á börum og beint í sjúkrabíl á sjúkrahúsið þar sem ég hitti lækni sem heldur að ég hafi slitið krossbandið og miniskus. Ef það er rétt verð ég að minnsta kosti sex mánuði frá æfingum og keppni.
Læknirinn hérna úti sagði að það þyrfti að gera aðgerð á hnénu sem fyrst og fer ég til Austurríkis í dag og í aðgerð í kvöld eða á morgun.
En hér er mynd af mér í brautinni í gær sem Guðmundur Jakobsson tók:

-Gísli Rafn í Val d’Isere

Já þannig er það nú. Ég var í dag dæmdur úr leik í úrtökumóti fyrir HM í stórsvigi hér í Val d’Isere. Ég var í 25. sæti eftir fyrri ferðina en 25. fyrstu komast í aðalkeppnina. Ég fékk svo auðvitað ekki að keyra seinni ferðina vegna þess að ég var dæmdur úr leik.
Ástæða þess að ég var dæmdur úr leik var að ég var í ólöglegum galla, þ.e. hann hleypti ekki nógu miklu lofti í gegnum sig. Ég og þjálfarinn vissum þetta fyrir mótið, ég hafði farið með hann í tékk kvöldið áður og þá kom í ljós að hann var ólöglegur. En þar sem að þjálfarinn minn sagði að mótið á morgun (í dag) væri bara FIS mót yrði ekki tékkað á þessu atriði. Því ákvað ég að keppa í gallanum mínum en fá svo lánaðan annan galla ef ég kæmist í aðalkeppnina.
Auðvitað sé ég núna hversu fáránlegt það var að taka sénsinn á þessu atriði þar sem það kostaði mig þáttökuna á HM í stórsvigi. En ég er líka ákveðinn í því að láta þetta ekki skemma fyrir mér svigið og ætla á svigæfingu á morgun. Úrtökumót fyrir svigið er svo á laugardaginn og aðalkeppnin á sunnudaginn.

Heyrðu ég er kominn til Val d’Isere í Frakklandi og hér mun ég taka þátt í heimsmeistaramótinu.
Komum reyndar á sunnudaginn og ég frískíðaði stórsvig á mánudaginn, æfði svig í gær og stórsvig í dag (miðvikudag). Var góður á æfingunni í dag sem er gott því á morgun mun ég keppa í úrtökumóti fyrir aðalkeppnina en 25 fyrstu komast áfram. Það verður rokk

Soell 06-02-2009 from Gísli Guðmundsson on Vimeo.

Jæja, nú er ég ennþá í Slóveníu. Ég og Sippi erum búnir að vera að æfa hérna í Ravne núna seinustu tvo daga, en Ravne er í 5 mín akstri frá Prevalje, bæinn sem ég bý í. Þar er lítil T-lyfta þar sem við æfðum svig. Ingvi Geir er kominn hingað til okkar og ætlar að vera aðstoðarþjálfari hjá landsliðinu út febrúar. Það er hið besta mál

Á morgun (miðvikudag) fara ég og Bjöggi til Hinterreich í Austurríki að æfa svig. Þar er brekka sem er alltaf vötnuð og haldin snjólaus (er skafin þegar snjóar) og alltaf góðar aðstæður til æfinga í mjög hörðu færi. Svo fer ég kannski að keppa á föstudag og laugardag í svigi og síðan keyrum við til Val S’Isere í Frakklandi á sunnudag þar sem heimsmeistaramótið verður haldið. Þar mun ég keppa í úrtökumóti í svigi og stórsvigi þar sem 25 fyrstu fá að keppa í aðalkeppninni og stefni ég auðvitað á það að komast í hana Úrtökumót í stórsvigi verður 12. feb og aðalkeppnin 13., svo verður úrtökumótið í svigi 14. og aðalkeppnin 15.

Í dag og í gær kepptu ég, Sippi og Stebbi í svigi á alþjóðlegu FIS móti í Crna í Slóveníu.

Það hefur snjóað mikið undanfarið hérna í Mið-Evrópu þannig að aðstæður voru erfiðar þar sem að brautin grófst mjög mikið vegna þess hvað snjórinn var mjúkur. Ég startaði nr. 31 og var náði ekki að fara nógu hratt til að komast í viðsnúning 30 fyrstu, var 40 brotum frá því og 2 sekúndum á eftir fyrsta manni. Seinni ferðin gekk mun betur en þá var ég 1,2 á eftir fyrsta manni og bætti punktastöðuna mína aðeins, eða um hálfan punkt. Ánægður með þá bætingu þó að lítil sé, það er allavega betra en engin bæting !

-Gísli Rafn í Petzen